POESIA

Che cazzimma tene è 'a vita,
quanno 'int'o mmeglio te lassa.
Mentre vede ca t'ha spasse,
te strattona, corre e ppassa.
T'abbandona bello e bbuono,
senza te cercà 'o permesso,
se nne va a ll'intrasatto,
lassànnete comm'a nu fesso.
'A morte è fetente...aspetta:
nun se trova maje llà pe ccaso!
Zitta zitta e ccazzimmosa
te leva 'a vita 'a sotto 'o naso.
Pure si vaje cuonce cuonce
quase senza fa rummore
e d' 'a vita ne siente
a mmalapena addore,
essa sta llà già acquattata...
t'afferra, te piglià e ddice:
"nisciuno è meglio e n'ato..."
... e tu comme 'a cuntraddice!
Nun lle daje cunferenza...
ma quann'essa s'è ncurnata,
è inutile fa' resistenza;
int'â nniente t'ha afferrata.
Se mette attuorno 'o tavolo:
nuje simmo 'o mazzo e carte.
Chesta vence e chesta perde:
ammesca, scarta e sparte.
Può fa' pure carte faveze,
tenè tutte quante ll'asse;
cu essa non può dicere:
"va buò 'sta vota passo."
Può avè tutte 'e rragione,
cu essa haje sempe tuorto.
Se mette attuorno 'o tavolo:
a ttressette tu faje 'o muorto.
Pecché a morte è sfaccimma
nsulente e cazzimmosa.
Nun lle fa' specie niente;
manco 'o cchiù 'e ogni ccosa.
Può tenè pure 'e bbrillante,
chello ca costa cchiù caro:
anfore, curone 'e rubine,
diamante e pperle rare.
Nun lle mporta comm'è 'a pelle,
quanno tu sì brutto o bbello.
Si hê cammenato pare pare
o si hê fatto o paro e 'o sparo.
Può tenè sorde assaje:
sotto o lietto, 'int'ê bbuatte.
Tutto ll'oro d' 'o munno:
essa nun scenne a ppatto.
Chello ca essa vo'...
chesto te po' ssapè amaro:
sì ricco o puveriello...
...nun s'accatta cu 'e denare.

Poesia scritta il 16/08/2019 - 14:47

Da Giovanna Balsamo

Letta n.1136 volte.

Per inserire un commento e per VOTARE devi collegarti alla tua area privata.

______________________________________________________________________