POESIA

Comme sole 'e vierno
ca pe' dint'e nuvule
va e vène e nun scarfe
o comme viénto ca passa
pe' vico senz'aria
e nun se ferma maje
pure tu pè sta vita mia
trase passe e ghièsce
e 'nziemo a me nun rieste!
CChiù tiémpo se cunsuma
e cchiù 'ncatenato me tiène:
si viene, sì alba e luce
si te ne vaje, notte e scuro!
Accusì me vuò fa campà
e aspettà 'a morte
accussì vuò trattà
stu bene ca te voglio?
Eppure carezze e vase
me n'hé date e te ne pigliàte
senza sciato, comme a me,
pure tu 'ncantata si restata!
Cucevemo tutto e duje
(t'arricuorde?) ce sbatteva
'o core, 'o sanghe vùlleva
redevano quatt' uòcchie
quatto stelle lucevano
m'addurmevo e me scetavo
e sempe a te tuccavo!
Nu suonno tantu dóce
ca pure t'ha fatto cumpagnìa
cu tant'amaro po' l'hé accìso
e na pucundrìa l'ha atterrato.
Stu bene ovèro ca te voglio
si nun se stuto e arde
pecché nun tène cielo
pecché nun tène dimane?
'O sento ogne mumento
ca mo sulo addà campà
si 'ngrata nun te ne curo
si nun saje o vuò sapè
tutto l'ammore ca te vò dà.
Spina turmiento e pena sì
séte e famme daje a stu core
si me staje luntano
ma si vicino te tengo
'o ssaje cchiù meglio 'e me
ca rosa schiuppata e passione sì!
Sentènno stu parlà mio
nun te fà cchiù sorda
nun ridere e crìdece
si nat'a vota suranno te dico:
-Senz''e te nun saccio campà !-
A stu core ca è sempe 'o stesso
senz'aspettà fin'a dimane
sincera falle sapé
si a campà 'o vuò ajutà
e speranza dóce te vuò fà!

Poesia scritta il 10/02/2016 - 10:34

Da Angelo Michele Cozza

Letta n.586 volte.

Per inserire un commento e per VOTARE devi collegarti alla tua area privata.

______________________________________________________________________