POESIA

Ogn'uno che se 'a sente 'e nummenà
fa cos'è pazzo, t'arrevota 'o cielo
pe' 'na parola ditta contro a essa
...fosse capace 'e fa' 'na fessarìa.

'A quanno 'o munno è munno è accussi...
'o bbene 'e mamma nun tene cunfronte
te tiene 'o mmale fatto 'a tanta ggente
ma a mamma è mamma nun ce l'he tuccà.

Chi stà luntano 'a essa se dispera
se porta appriesso dinte 'o portafoglio
ritratte e cemmeraglie pe' ricordo
e 'o bbene azzeffunnato dinte 'o core.

Pe' cchi pò nunn 'a tene ... nun ve 'o ddico...
..p'ammore 'e Ddio chisto è sacrileggio
squartalo pure, fallo piezzo, piezzo
ma te cunviene 'e nunn annummenà.

Ma ij ve 'o ggiuro nunn è fessaria
sarraggio pure nu presuntuùso
ma ij credo ca nisciuno maje vò bbene
cchiù 'e comme voglio bbene a mamma mia.