POESIA

(Parla lui)
Pirchì scappi amurusa mia quannu mi vidi caminari?
Ti vo forsi fari assicutari?

Prima mi talì
e mi fai u signali cu sta vucca russa china di russettu.
T’ammucci e poi nesci fora a farimi ogni dispettu.

Ni certi mumenti, diventi camurriusa e stravaganti.
L’amuri tò pari seriu,
ma inveci è sempri cangianti.

Di chè ca sì seria veramenti…
pocu dopu, m’arridi, fai a scialusa
e diventi puri indisponenti.

Prima m’addumanni milli carizzi…
e poi fai scorbutica comu s’havissi setti biddizzi.

Di che pi nenti ti mostri gilusa,
poi cangi e divinti ruvida e spinusa.

Mi vo diri tu, c’haiu a fari pi tiniriti tranquilla?
Cu tia, mancu ci po’, na forti tisana di camomilla.

Beddamatri!
Ora ti lassu e nun ti vogghiu vidiri chiù!
Vidi ca sugnu seriu!
Staiu giurannu dinanzi a Gisù.

Mi ni vaiu na vota pi sempri.
Daccussì impari ad amarimi veramenti.
(Risponde lei)

Avati, amuri miu!
Ora facemu a santa paci
e a to vuccuzza ci vogghiu dari millli vasi.

N’autri milli, ci dugnu a sti capiddi gialli di frummentu,
e milli ancora, a st’occi ca insegunu stu ventu.

Dicu sempri … milli voti ca ti vulissi lassari …
Pi to capricci … tu mi fa addannari.

Eppuri, nun pozzu fari a menu du to caluri.
Fussi comu l’api senza nu beddu sciuri.

L’api ca suca u meli pi campari
e iu ca speru ca ti pozzi cummugghiari.

Amuruzzu miu!
Sciatuzzu du me cori
talia chi ti purtai dintra chista manu ginirusa!

È l’acqua du mari sciavurusa.
È chidda ca ti fa bedda sta facciuzza
tunna, carnusa, pulita e amurusa.

(Brano tratto dal libro dello stesso autore: “Filastrocche magiche e disincantate, con dipinti e personaggi d’autore. Volume 4” Ediz. Youcanprint self publishing. Settembre 2015)