ca teni cchiù valori ti la vita
puru ci shtannu tanta cosi a josa.
La vita è cosa ca hava essi' capita
e ognunu l'hava vviviri cu amori
pi putì' aviri dignità 'nfinita.
È vveru ca si lassa cu ddulori
quann'è 'rrivata l'ora ti la morti
ca veni senza mancu fa' rumori,
ma ogni crishtianu s'hava ssènti' forti
pi vvenciri duluri, patimienti
e l'atri 'uai ca nci manna la sorti.
Ci ti mali unu no' è mai fattu nienti
pó sci' contr'alla morti orgogliosu
e pó èssiri t'esempiu all'atra genti.
Lu passu ti la morti è silenziosu
quannu si shta 'vvicina chianu chianu,
però ddiventa assai pricipitosu
ci la vulimu nui ti noshtra manu.
'Shta cosa no' nc'havà succeti' mai,
percé cusht'attu è lu cchiù disumanu.
Puru ci metti fini at ogni 'uai,
va contru la natura e contru Diu
ca è ssulu a ssapì' cce havà ffa' crai.
E cushtu lu capiscu bbuenu iu,
percé 'na vota 'nu cumpagnu mia
pi lla dispirazzioni si ccitìu.
Mai s'hava ffa' ccussì, comu sia sia!
Pi ffermari lu passu ti la morti
no' sservi la cchiù bbrutta malatìa,
percé si ponnu apriri atri porti;
quann'edda si ni veni cchiù vicina
ni pó ffa' puru sèntiri risorti!
Sienti lu passu quannu shta ccamina
e ppari comu ci èti eternità,
percé la morti è vuluntà divina!
Nota: Poesia in vernacolo sanvitese.
Non acclusa traduzione in italiano
per mancanza di spazio.
Opera scritta il 26/04/2014 - 08:52Voto: | su 2 votanti |
Giuseppe Vita 
27/04/2014 - 20:22 Ciao
Franco
Franco Di Michele 27/04/2014 - 19:45